Gol nó gáire?

Cheannaigh mé mo phiollaí hormóin inné, piollaí atá le tógáil ar feadh cúig bliana - agus in amanna, ag daoine eile ar feadh a saoil. Chosain an bosca céanna beagnach dhá chéad euro (don mhí) ach leis an scéim drugaí i nDeisceart na hÉireann ní ghearrtar ach uasmhéid de 144 euro orm in aghaidh na míosa. Rinne mé an druga céanna a fhiosrú ó thuaidh ach ní raibh móran sa difir agus ní fiú iad a cheannach ansin.

Inné, chosain an bosca thuas 122 euro. Ísliú 70 euro, a bheag nó a mhór. An tríú cuid den phraghas bainte de, a bheag nó a mhór.

 Wúhú, arsa mé fein liom féin.

Agus ansin...chuimhnigh mé ar an airgead a bhí caite agam féin agus ag daoine eile mar nach raibh na poitigéirí ná na húdaráis sláinte gníomhú ar ár son níba luaithe. 

Gol nó gáire?

Costas ailse

Cé mhéad  a chosnaíonn leigheas ailse? Tá drugaí nach gcuireann an NHS sa Bhreatain ar fáil ar chor ar bith. Ní chlúdaítear costas chaemo ar árachas príobháideach ó dheas.

D'athraigh mé ón chóras sa Tuaisceart go dtí an córas ó dheas ar fad ar na mallaibh. Seo sampla den athrú suntasach atá feicthe agam féin:

Ó thuaidh:
Cúig bliana den druga Aromasin le tógáil.
Costas gach mí: £0,000.00 (ní ghearrann an poitigéir faic ar oidis dochtúra. Faic.)
Costas bliana : £0,000.00
Costas thar an cúig bhliain: £0,000.00

Ó dheas:
Cúig bliana den druga Aromasin le tógáil
Costas gach mí: €132.00 (tá €195 ar an druga ach ní ghearrann an poitigéir ach méid an Scéim Druga, €132)
Costas gach bliain: €1,584.00

Costas thar cúig bhliain: €7,920.00

Limféidéime

Bhí mé ag an dochtúir ar na mallaibh le mo chuid cógaisí a athrú ó Tamoxifen (hot flushes, sceadamán nimhneach i gcónaí, éirí níos ráimhre, pianta sna cosa, drochbhlas sa bhéal i rith an ama) go hExemastane (??? pianta sna cosa, ach cá bhfios cad eile. Beidh fadhb agam leis an mheácan, cinnte , mar gur stéaróideach atá ann.)

Bhí sí ag dul tríd na nótaí agus ar sí, 'ó, agus an limféidéime, caidé mar atá sí ag teacht ar aghaidh?'

'OK,' arsa mise.

'Just ok?' ar sí

Bhain sé geit asam. Ní ulpóg ná slaghdán ná triúch ná aon rud eile a d'imeodh le linn ama a bhí ann. Is rud í a bheadh agam i gcónaí. Láimhseáil atá i gceist, ní biseach.

Ach bhí sí óg, mar dhochtúir. Agus lig me di.

'Ar nós diaibéiteas mo mháthara, a dhochtúir, beidh sí agam i gcónaí. Tá glacadh agam leis sin' arsa mé.

Agus caithfidh mé glacadh leis. Bhí me ag cuartú eolais don Exemastane agus chuaigh mé go fóraim Amoena. Tá catalóg ann d'fho-éadaí do mhná a raibh díchíochú acu, ach sna fóraim tá eolas ar eispéireas na mban sa reimse seo. Is catalóg ar an éadóchas é, cuid mhaith de, agus bí cúramach má théann tú a léamh. Léigh idir na línte - an é an t-éadóchas atá ag cruthú na faidhbe nó an leigheas? Ach tá eolas ann nach bhfaighidh tú ar an bhileog eolais sa bhosca cógaisí. Úsáideach.

Níl an t-éadóchas céanna orm féin, in ainneoin is go bhfuil mo chorp tugtha don dúlagar. Ní bhaineann an ceann amháin leis an cheann eile. Agus tá fear cineálta agam.

Ach bím cúramach agus mé ag surfáil. Tá deora go fras amuigh ansin, agus ní gá do chuid féin a chur leo.