Friday, 19 March 2010

Tinn tuirseach


De réir mar a théann tú ó chúrsa chaemo go cúrsa eile chaemo, éiríonn do chorp níos laige agus níos laige. Agus tagann claochló ar na mothúcháin chomh maith. Fearg an mothúchán is mó a tháinig chun cinn ionam féin. Mhothaigh mé fearg dochreidte le linn chaemo. D’eascair roinnt den fhearg seo as an eagla a bhí orm, mar cruthaíonn eagla fearg. Ach tháinig go leor den fhearg mar thaobhéifeacht den chaemo, agus ó hormóin athruithe, brúite, scuaiste. Chonaic mé an fhearg seo (níos measa ná mé féin!) i ndaoine eile a bhí ag dul faoi leigheas don ailse. Shíl mé ag an am go raibh mé socair, suaimhneach. Tuigim anois go raibh mo chorp faoi ionsaí agus go raibh mé ag iarraidh greim a choinneáil ar mo bhuntús, mo réadúlacht, mo chiall.

Deireadh an tsamhraidh a bhí ann. Bhí mé i ndiaidh an samhradh a chur isteach idir scian agus instealladh. Agus bhí mo chuid comrádaithe múinteoireachta scaipthe don samhradh, nó scaipthe roimh an ailse. Mhothaigh mé lag, tinn, tuirseach agus tréigthe. Bhí, is dócha, go pointe áirithe - tréigthe, ach anois, tchím go raibh na hormóin ag beathú drochspion agus lionn dubh.

No comments:

Post a Comment