Showing posts with label Lá na Máthar. Show all posts
Showing posts with label Lá na Máthar. Show all posts

Monday, 16 March 2015

Urraim don mháithreachas


Thrácht mé ar an fhéile seo roimhe, féile nach bhfuil mé ró-thugtha dó lena shiúcracht is a ghleoiteacht gan teorainn. Bímis umhal do na máithreacha, a deir an féile seo. Inniu. Bímis buíoch as gach rud a rinne siad dúinn. Inniu.

An raibh Lá na Máthar faoi shéan is faoi mhaise agaibh, a mhná na hÉireann? Anois go bhfuil an Luan buailte linn?

An bhfuil bhur bpinsean méadaithe inniu ón lá inné, ó thug sibh suas an jab lán-aimseartha agus bhur n-áit sa scuaine ardú pá chun páistí a bhreith ar an tsaol, a riaradh is a thógail? Níl? Ná bígí buartha. Seo dhaoibh bosca seaclaide uair sa bhliain.

An raibh Lá na Máthar faoi shéan is faoi mhaise agaibh, a mhná simfiseatóime, anois nach bhfuil sibh in ann rith nó damhsa, nó in ann ag jab a choinníonn ar bhur gcosa sibh, nó cúrsaí leithris féin a laimhseáil le dínit mar nach bhfuil na húdaráis a cheadaigh a leithéid de bharbarthacht sásta freagracht a ghlacadh as an urraim seo a rinne siad don mháithreachas? Seo dhaoibh cárta Hallmark.

An raibh Lá na Máthar faoi shéan is faoi mhaise agaibh, a Mhaigdiléanaigh, sibhse ar sciobadh leanaí agus saol uaibh, agus beocht féin in amanna? Seo dhaoibh planda le blatha deasa.

An raibh Lá na Máthar faoi shéan is faoi mhaise agaibhse a bhí ag iarraidh gabháil isteach i gclinic Marie Stopes i mBéal Feirste ar an mallaibh le gnó príobháideach nár bhain le madaidh na sráide a dhéanamh? Seo dhaoibh scairf nua. Le páipéar deas thart air.

An raibh Lá na Máthar faoi shéan is faoi mhaise agaibh, a bhaill d'fhoireann rugbaí buacach na hÉireann, anois go bhfuil an Luan tagtha agus an níocháin ó na cluichí sin le cur sa mheaisín? Seo dhaoibh Toblerone.

Agus sula suíonn duine éigin siar chun pápaireacht a dhéanamh ar shearbhas an mhéid atá thuas - 1) tá clann orm, 2) leanann siad nósmhaireachtaí na tíre gach bliain ag iarraidh lá speisialta a dhéanamh de agus 3) tugaim amach gach bliain, ag míniú - arís eile -  gur Lá Hallmark é agus nach maith mar atá a fhios acu é. Ní féidir luach suarach a chur ar mháithreacht  nó athaireacht lá sa bhliain, a deirim. Agus gach bliain bíonn díomá orm nach dtagann siad isteach chugam le saoire réamhíoctha gach costas san aireamh go Barbados, nó Capri, b'fhéidir.


Sunday, 10 March 2013

Lá na Máthar

An apostle ball on a slice of simnel cake

Níl mé iontach tugtha do 'Lá na Máthar', in ainneoin is go gcreideann mo chlannsa go gcaithfidh siad freastal a dhéanamh air (dinnéar a réiteach dom, ach i ndáiríre b'fhearr liom go ndéanfaidís an hooveráil). Is iarsma ó shochaí na Breataine é, agus iarsma den aicmeachais a chuaigh leis an chultúr sin. Faill a bhí ag na cailíní aimsire éalú ó na tithe móra ar an Domhnach seo, cúpla Domhnach roimh an Cháisc, le císte Simnel ina nglaic acu, lena gcuid máithreacha féin a fheiceáil. Bhí teacht acu ar na huibheacha uilig nach raibh cead a n-ithe i rith an Charghais chun roinnt bheag den saibhreas tí mhóir a bhronnadh orthu sa bhaile bhocht shuarach.
Mar bheidís ró-ghafa ag an Cháisc féin ag tabhairt aire do na huaisle sa teach mór, ar ndóigh.

Níl aon dabht ná go mbhfuil an Domhnach áirithe seo fréamhaithe sa réamhChríostaíocht chomh maith, ná tá an focal 'simnel' fréamhaithe sa Laidin 'similia' (plúr mín). Ach tá seilbh glactha ag muintir na Breataine air agus é ag spréadh anoir orainn inár n-ainneoin.

B'fhearr liom féin i bhfad  Lá Idirnáisiúnta na mBan. Ní chaithfidh tú páiste bheith agat, is leor bheith i do bhean. Is cuma cá n-oibríonn tú - sa teach nó lasmuigh. Is cuma cine, craiceann ná creideamh. Agus ní chaithfidh tú na huaireanta a chaitheamh ag déanamh ocht rollaí beaga dhéag de marzipan as almóinn, siúcra agus ubh sula dtugann tú cuairt ar do mháthair. Siúlóid fhada, nó gloine fíona le cairde/comharsana  ban, nó cupán tae agus leabhar maith mar chuideachta.

Mar fhocal scoir, chuir mé ceist ar m'iníon cad as a dtáinig 'Lá na Máthar'? 'Hallmark', a d'fhreagair sí.