FaceBook - tomhas...

Ceist agam ar na saineolaithe ríomhaireachta amuigh ansin.

D'athraigh mé ríomhairí cúpla mí ó shin. Bhí an seancheann ag rith ar XP, agus nuair a deirim 'seancheann', sean, sean, sean a bhí i gceist. Fuair mé é nuair a chaith institiúid tríú leibhéal amach é. Tá sé níos saoire ar choláistí na gléasanna a bhronnadh ar dhaoine saor in aisce seachas íoc as iad a athchúrsáil.

Ghéill mé do Windows (ba bhreá liom Apple ach níl an oiread sin airgid agam!) agus cheannaigh mé ceann nua le Windows 8.1. Agus chuir mé blaosc Windows 7 sa mhullach ar an leagan 8, mar níl scaileán idirghníomhach agam. agus bhí Windows 8 mo chur ar na daoraidh.

Sin a bhfuil sa táin ag an ríomhaire nua.

Bhronn mé an seanríomhaire ar chomharsa liom a bhí 'idir ríomhairí'. Cuirimis Melissa uirthi, agus cuirimis Fionn agus Oisín ar a mac. Bhí sí leis an ríomhaire a athchúrsáil í féin nó a chaitheamh ar ais chugam nuair a bheadh ceann nua aici ar ball. Tá sé aici fós nó tá sé athchúrsáilte, ní fios.

Ócé. Seo mo thomhas.  Nuair a osclaím geata FaceBook de ghnáth, tagann gach ríomhphost le gach duine sa teach aníos ar an bhosca úsáideora. Mise, mo chlann, cúpla cara leo siúd ar thug mé cead daofa é a úsáid anois is arís.
Ach le tamall anuas tá seolta ríomhphoist Melissa agus Fionn agus Oisín ag teacht ar an liosta seo chomh maith. Ní raibh na mic ariamh i mo theach. Ní dhéanann mé féin agus Melissa ach caife a ól - is í an teicneolaíocht is sofaisticiúla a úsáidimid ná an citeal.

Tuigim go bhfuil baint idir an seanríomhaire agus é seo. Tá súil istigh agam, má thagann Fionn nó Oísín ar mo chuntas FB, go mbeidh feabhas ar a gcuid Gaeilge dá réir. Níor haiceáil siad isteach i mo chuntas ná i gcuntas mo mhuintire - go bhfios dom -  le haon ábhar neamhoiriúnach.

Ach ba mhaith liom fáil amach conas ar tharla sé, le teann fiosrachta.

Freagra an tomhais seo ag éinne?

Facebook don obair - Yammer

Caithim roinnt mhaith ama ar Facebook, dalta go leor againn. Úsáidim é don earnáil shóisialta atá agam, agus feidhmíonn sé go maith chun tagmháil a choinneáil le cairde is le gaoltas. Feidhmíonn Facebook chomh maith chun teacht ar dhaoine nua i mo shaol, nó daoine a d'fhág mé i mo dhiaidh nuair a bhog mé ó Bhéal Feirste go Baile Átha Cliath.

Táthar i ndiaidh coincheapanna Facebook a chur in oiriúnit don earnáil ghairmiúil, agus an tuar go gcuirfidh a leithéid deireadh le riomhphost sna comhlachtaí a úsáideann é. 'Yammer' atá ar an ardán seo (in ainneoin is go bhfuil ardáin cosúil leis ag teacht sna sálaí air).

Cuireann Prensky síos ar an fheiniméan seo ina alt, 'The Right Stuff'. Is é Marc Prensky an fear a chum an téarma 'dúchasach digiteach'. Seans nach n-aontaíonn daoine leis ina iomláine, ach tá roinnt mhaith den todhchaí amach romhainn i dtéarmaí teicneolaíochta agus sóisialta á léiriú aige.

Ina alt thuas, deir se go bhfuilimd tagtha ón litir fhisiciúil go dtí an ríomhphost fíorúil agus go n-athróidh sé seo go dtí an t-ardán sóisialta (Facebook, Yammer, srl.). Tá seo fíor ag go leor daoine, mé féin san áireamh. Tá sé níos fusa in amanna dul isteach sa timpeallacht fhíorúil atá ag Facebook agus tráchtanna a fhágáil, ríomhphoist 'FB' a chur chuig daoine a bhfuil sé le déanamh agam, corrchomhrá bheith agam le duine ar bith eile atá ar líne ma tá an t-am agam, agus tráláil i gcomhair nuacht an lae ó chairde agus ó theagmhálacha eile atá agam ar an ghréasán áirithe sin.

Tá Yammer i ndiaidh na gnéithe seo a úsáid i ndomhain an ghnó, agus dul i dtreo cluichithe na timpeallachta oibre. Gné eile a ruaradh ag Prensky in 'The Right Stuff'.

Ceann de na gnéithe is suntasaí ag Facebook do chomhlachtaí ná a oscailteacht. Ar ndóigh, ní oibreoidh sé seo muna bhfuil an comhlacht féin oscailte! Ach má chuirtear tracht ar an ardán, rachaidh sé in airde le go bhfeicfear é ag chuile dhuine. Agus déanann cláir ar nós Facebook agus Yammer ord tosaíochta i bhfeidhm ar thráchtanna. An-tábhachtach. Agus más ceist atá ann gur féidir le duine eile sa chomhlacht a fhreagairt, beidh an freagra nó na freagraí ansin rompu láithreach. Agus beidh deireadh le ríomhphoist chuig 'allstaff' sa bhosca  poist gach maidin.

Tá Yammer in úsaid cheana ag comhlachtaí ar nós Suncorp, Pitney Bowes, Ford agus eile. Coinnígí súil amach fána choinne. Yammer nó a leithéid ar an  bhealach chuig do chomhlacht-sa.  Má oibríonn tú le comhlacht a chleachtann  oscailteacht...