Buíochas

Deir na siceolaithe nach bhfuil sárú ar an bhuíochas mar ghléas chun do chroí a ardú nuair a mhothaíonn tú brónach nó faoi ghruaim. Bhain mé triail as straitéis a mholann siad roinnt blianta ó shin, agus ó shin i leith, úsáidim é ó am go chéile nuair is gá. An straitéis a mholann siad ná dialann buíochais a choinneáil gach oíche, agus scríobh isteach ann gach uile oíche sula dtéann tú a luí. Séard atá le scríobh agat ná cúig rud a bhfuil tú buíoch astu, is cuma cé chomh beag suarach iad mar nithe. Cupán deas tae, nó gae gréine ar lá dorcha. Agus de réir mar a aithnímid go bhfuil rudaí inár saol nach bhfuil gruama, is amhlaidh go neartaíonn an intinn ar a chumhacht féin ár spiorad a dheisiú. 

Tharla sé domh ag pointe éigin inniu gur aithin mé go raibh lá iontach agam mar gheall ar na rudaí beaga i mo shaol seachas na rudaí móra. Seo iad: 

1. Samhradh 2013, ina shamhradh cheart. Bíodh is go raibh tintreach agus toirneach agus báisteach ann inniu, bhí maidin gheal ghrianmhar againn anseo i mBaile Átha Cliath agus dealáin idir na ceathanna. Agus tá me thar a bheith buíoch go ndeachaigh mé anonn go Oideas Gael don tseachtain is deise sa bhliain. 

2. Aldi, Bóthar Chnoc an Fhuaráin. Tá polasaí nua acu - iarrann siad ar gach uile dhuine a cheannaíonn alcól de shaghas ar bith an bhfuil siad thar bhliain is fiche d'aois. Istigh ag ceannach buidéal fíona, ba mhór an t-ardú croí an cheist seo a chluinstin curtha orm féin. 'Go raibh maith agat', a dúirt mé leis an fhreastalaí óg, 'ta lúcháir orm gur chuir tú ceist orm nár cuireadh leis na blianta, agus tá lúcháir orm go bhfuil mé sean mo dhóthain leis an bhuidéal seo a ól!'

3. Woodie's, Leamhcán. Tá Margaret ag obair ann, ar chomhaois liom féin (caogaidí). Cúpla mí ó shin thóg sí mo chárta bainc le próiseáil agus thug sí m'ainm faoi deara, go raibh an t-ainm i nGaeilge. Tá Gaeilge ghalánta na Mumhan ag Margaret, agus diúltaíonn sí Béarla a labhairt liom ó shin. Bhí an bheirt againn ag plé Peig Sayers inniu, thar na málaí bruscair is an síol leitís don gheimhreadh. Margaret, Woodie's, Leamhcán.

4. Áine sa Cheathrú Póilí i mBéal Feirste. Bhí mé istigh ag ceannach roinnt ábhar léitheoireachta cúpla lá ó shin agus d'aithin sí go raibh mé in ísle brí. Chuir sí i mo shuí mé agus fuair sí cupán deas tae domh. Go raibh maith agat, a Áine.

Deireadh ré, tús nua

Tháinig mé ar ais chuig an domhan blagadóireachta arís i ndiaidh tréimhse ar lár. Mar go bhfuil am agam chuige arís. Agus mar go bhfuil mé sa dé deiridh leis an jab atá agam. Beidh mé réidh leis an tseachtain seo chugainn. Tá cuid díom sásta, mar go bhuil mé tuirseach den taisteal. Ach bhí daoine deasa mar chuideachta agam ann, agus crothnóidh mé iad siúd go mór.

B'ait liom turas a thabhairt ar na blaganna Gaeilge eile acu agus téama láidir an earraigh i mbarr réime. Saol nua, túsanna nua, grian agus gile agus borradh agus bláthú. Thug sé misneach domh. Níl sé nádúrtha stop a chur le dua i lár earraigh, fiú más mé féin a rinne an cinneadh. Ach léigh mé faoin nead ag Áine, agus an lao ag Eoin, an ghrian agus an íomhá ag John, agus fiú an cnagaire ag cnagaireacht leis. Agus go raibh maith agaibh, sibhse na blagadóirí ar fad a scríobh agus a thóg grianghraif agus a rinne trácht. Ardú croí a bhí ann domh, agus cic sa tóin!

Chuir mo thuras thart ar na blaganna roimh mo shúile athuair go bhfuil saolta eile amuigh ansin. Tá deireadh ag teacht leis an phost agam mar gheall ar chúrsaí éagsúla. Ceann acu is ea an tuirse a fhágann an ailse ar roinnt againn go ceann na mblianta. Ach tá saolta eile amuigh ansin, a mbeidh mé in inmhe tabhairt futhu ar mo luas féin. Agus in am agam breith ar cheann anois go bhfuil an t-earrach buailte linn.