Cionn tSáile, Eanáir 2014

'Dubhluachair na bliana, idir Nollaig is Féile Bhríde.'

Níl duine ar bith ar an domhan chlár níos sásta ná mé féin solas na gréine a fheiceáil ag filleadh. Is duine S.A.D. mé, tá mé ag déanamh, agus fearaim failte roimh Lá Fhéile Bhríde agus tús an Earraigh. Yeah, yeah, yeah, deir na daoine óga sa teach liom go bhfuil sé sin uilig athruithe ach má bhí sé ceart go leor ag na Ceiltigh, a bhí faireach agus pointeáilte faoin aimsir, déanfaidh sé cúis domhsa chomh maith. Earrach? Ní féidir leis theacht gasta go leor.

Ach fuair mé faoiseamh beag ag an deireadh seachtaine. Chaith mé cúpla lá i gCorcaigh, ar cuairt ag an iníon atá ag caitheamh tréimhse staidéir san fhíorPhoblacht don bhliain acadúil seo. Agus nár ghrianmhar agus nár gheal na laethe Eanáir a bhí againn ann. 

Dún Rí Shéamais, Cionn tSáile. Eanáir 2014

Thugamar cuairt ar an phríosún Dé hAoine. Leoga,is maith go raibh solas na gréine ann mar bhí an áit fuar feannaideach, agus daor ar an mhéid a bhí le feiceáil ann. Ach maorga.

Príosún Chorcaí, Eanáir 2014

Bhí an Satharn geal leis, ach chomh fuar sin. Bheartaíomar siúl thart fá Dhún Chathail i gCionn tSáile agus leanstan ag siúl chun teas a chothú agus a choinneáil sa chorp.

Dún Chathail, Cionn tSáile, Eanáir 2014

Ach an Domhnach. Cé a chreidfeadh go mbeadh maidin Domhnaigh in Eanáir caite ar an trá go sócúlach, sóisialta; páistí ag lapadáil san uisce, madaidh ag rith suas síos an gaineamh mín.

Ní raibh gach trá mar sin. Ag Baile Ghearóid, bhí balla de shnáth mara agus d'fheamainn bhuí a d'fhág an stoirm tamall gairid ó shin. Bhí páistí ag dreapadóireacht agus ag súgradh ann. Bhí an bóthar mór stróctha ag clocha duirlinge agus gaineamh a caitheadh aníos air. 

Baile Ghearóid

Deireadh ré, tús nua

Tháinig mé ar ais chuig an domhan blagadóireachta arís i ndiaidh tréimhse ar lár. Mar go bhfuil am agam chuige arís. Agus mar go bhfuil mé sa dé deiridh leis an jab atá agam. Beidh mé réidh leis an tseachtain seo chugainn. Tá cuid díom sásta, mar go bhuil mé tuirseach den taisteal. Ach bhí daoine deasa mar chuideachta agam ann, agus crothnóidh mé iad siúd go mór.

B'ait liom turas a thabhairt ar na blaganna Gaeilge eile acu agus téama láidir an earraigh i mbarr réime. Saol nua, túsanna nua, grian agus gile agus borradh agus bláthú. Thug sé misneach domh. Níl sé nádúrtha stop a chur le dua i lár earraigh, fiú más mé féin a rinne an cinneadh. Ach léigh mé faoin nead ag Áine, agus an lao ag Eoin, an ghrian agus an íomhá ag John, agus fiú an cnagaire ag cnagaireacht leis. Agus go raibh maith agaibh, sibhse na blagadóirí ar fad a scríobh agus a thóg grianghraif agus a rinne trácht. Ardú croí a bhí ann domh, agus cic sa tóin!

Chuir mo thuras thart ar na blaganna roimh mo shúile athuair go bhfuil saolta eile amuigh ansin. Tá deireadh ag teacht leis an phost agam mar gheall ar chúrsaí éagsúla. Ceann acu is ea an tuirse a fhágann an ailse ar roinnt againn go ceann na mblianta. Ach tá saolta eile amuigh ansin, a mbeidh mé in inmhe tabhairt futhu ar mo luas féin. Agus in am agam breith ar cheann anois go bhfuil an t-earrach buailte linn.