Feirsteach agus Feirsteach Eile

Campas na Naomh Uile - an 'oifig'

Nasc anseo, ag caint le hAonghus Ó Lochlainn ar na mallaibh ar an raidió, mar gheall ar an obair atá mé ag cur romham mar scríbhneoir cónaithe le DCU i mbliana. Ag plé le fochéimithe, ag plé le scríbhneoirí eile, ag forbairt gréasáin scríbhneoireachta. Ag tógáil ar obair Chló Iar-Chonnacht agus na ceardlanna acu siúd.
Ar fáil ANSEO  (brúigh an cnaipe ag bun lena chur sa tsiúl)

Fáilte roimh dhaoine chuig an ghrúpa scríbhneoireachta i gcónaí. Cuir scéal chugam chun tuilleadh eolais a fháil. realtan ag hotmail ponc com

Béal Feirste -áit a bhfuil Ionad Uí Chonghaile anois  

Agus nár dheas An Ceathrú Póilí a bheith ar an chlár céanna - Áine Nic Gearailt ag cur síos ar stair an tsiopa ó thosaigh siad san Ardscoil agus muintir na háite ag cur síos ar thabhacht an tsiopa ina saol.

Na Feirstigh agus an Saoi

Dáta don dialann. Beidh léamh gearrscéalta ar siúl i mBéal Feirste sa Chultúrlann Aoine na seachtaine seo chugainn, ar a seacht a' chlog. 20ú Samhain.

Beidh an Saoi, Micheál Ó Conghaile, ag léamh óna leabar is nua, 'Diabhlaíocht Dé'. Tuilleadh faoin leabhar sin ANSEO.

Beidh Deirdre Ní Ghrianna ag léamh óna leabhar, 'An Gnáthrud'. Ní minic a léann sí, mar sin is fiú bheith ann agus cluas le héisteacht ort. Tá an scéal sa teideal seo, 'An Gnáthrud', ar an siollabas Ardteiste arís is arís eile. Tá na scéalta eile snasta agus sofaisticiúil.

Beidh Fionntán de Brún ag léamh óna leabhar 'Litir ó mo Mháthair Altrama'. Tá doimhne agus castacht sna scéalta seo agus raon leathan ábhair ann.

Beidh mé féin ann, Le 'Dílis' agus na scéalta bunaithe ar m'áit dhúchais.

Deochanna, soláistí agus comhluadar. Agus Kultur.

Aoine 20ú Samhain @ 7.00


Agus... ar an Satharn, ceardlann de chuid Cló Iar-Chonnacht. Ní bheidh se ró-mhall cur isteach air go fóill, seans. ANSEO

Dílis: ar an bhóthar

An chéad oíche de shraith 'Sliocht' thart, ag Oireachtas 2015. Is mór an t-athrú saoil é, ó bheith ag plé saothair litríochta ar an chúrsa Ardteiste le daltaí dúshlánacha arbh fhearr leo bheith ag baint plaiceanna as a chéile le compás. Aréir bhí mé i seomra galánta in Óstán Citywest ag breathnú ar thóinín Alan Titley mar a sheas sé roimh an tábla ag léamh agus ag geáitsíocht trí 'Leabhar Nóra Ní Anluain' agus 'An Bhean Feasa', ag fanacht ar mo shealsa. Bhí tábla ag barr an tseomra agus muid féin - na scríbhneoirí - inár suí aige. Nuair a tháinig  do sheal léitheoireachta, sheas tú agus shiúil tú go dtí an taobh eile den tábla, os comhair an tslua, na scríbhneoirí eile ar do chúl.

Déarfainn gurbh fhearr an radharc a fuair mé féin ar ... dhroim ... gach duine eile ná mar a fuair an triúr eile, Micheál Ó Conghaile, Anna Heussaff agus Alan ar mo ... dhroimse. Níl mé chomh tanaí is a bhíodh, ná gar dó.

Beidh trí oíche eile agam féin ag léamh le camchuairt 'Sliocht' i mbliana. Beidh Gaillimh agus Luimneach ar siúl níos moille an tseachtain seo.

Gaillimh, Dé Chéadaoin  4 Samhain

Luimneach, Déardaoin  5 Samhain

Beidh Béal Feirste  ar siúl ar 20 Deireadh Fómhair sa Chultúrlann, sa siopa leabhair ann, an Ceathrú Póilí.

Béal Feirste, Aoine 20 Samhain

Beidh mé féin ag freastal ar an cheardlann scríbhneoireachta atá Micheál Ó Conghaile agus Fionntán de Brún ag cur ar fáil an lá dar gcionn. Snas le cur ar chúpla scéal eile anois...

‘Tá sin fíor, a Áine’ arsa athair Aoife. ‘Bíonn an bóthar seo dubh le daoine i rith an lae, ach duine ná deoraí a tchí tú san oíche, a Aoife. Seachas na leaids ón chlub sóisialta, ólta. Nó níos measa arís, na joyriders. Maith an rud nach raibh carr ariamh againn i rith na dtrioblóidí, nó bheadh sé sciobtha acu le dódh.’

‘Anois, sciobfadh an lucht ceirtlíse é le wheelies a dhéanamh,’ a gháir máthair Aoife leis. ‘Agus dheamhan péas a thagann amach le ceacht a theagasc daofa.’

 ‘Cár fhág tú do charr féin, a Aoife?’ arsa a hathair léi.
Codlamh Sámh

teas agus seoladh

Beidh seoladh ann Dé Sathairn don Leabhar Nua. Beidh Róisín ann, glam agus groí Beidh me féin ann, nite, gruaig-ghléasta. Beidh cúpla blagadóir eile ann -  Aonghus, Áine agus seans go mbeidh duine nó beirt eile ann. Beidh gloine fíona ann agus speecháil, agus beidh gaol nó beirt ann chun béasaí a chur orm.

Baineann meaisín poiblíochta CIC geit asam lena ghairmiúlacht. Bhí mé díreach ag caint le Rónán inniu, leis an mBíBíCí - le gabháil amach i Mí na Samhna, le Raidió Norn Iron, le Raidió Fáilte, le Raidió na Life agus beidh tuilleadh ann chomh maith.

Fíon i do ghlaic agus fáilte romhat, ma bhíonn tú fán chathair an oíche Shathairn seo chugainn.

'B’shin tús na seachtóidí. Lean an t-arm leo, ag stopadh fir agus mná óga ar an tsráid lena gceistiú agus lena bhfragraí a sheiceáil leis an bheairic trína gcuid walkie-talkies.. Thosaigh siad ag cuartú tithe, ag breacadh nótaí faoi gach rud a bhí i ngach teach ag gach duine ar an bhóthar, Dath an lino agus patrún an pháipéir ar na ballaí féin san aireamh.  Intelligence, a dúirt siad.  Bhí círéibeanna suas an bóthar píosa uainn gach dara lá. Dódh busanna taobh amuigh den doras againn féin agus thógadh mo mháthair anuas na cuirtíní net ó na fuinneoga uair sa seachtain leis an salachar agus boladh na toite a ní amach astu.  Bhí cathanna gunnadóireachta idir snípéirí agus arm na Breataine i lár na hoíche, Domhnach is Dálach.'
as 'Teas'

Dílis: Blas

Agallamh le Blas, BBC Raidió Uladh, 1ú Deireadh Fómahir 2015 ANSEO, Brian Ó Maoláin i mbun an agallaimh.

Thug  Lára í féin faoi deara na hathruithe ina haintín ó chonaic sí í go deireanach, trí bliana ó shin. Gruaig a bhí airgeadta ar fad ar fad aici anois, gan dathú, ach gearrtha go tarrantach, maisitheach. Togha de chuid Marks ‘n’ Sparks don bhean atá ag an aois áirithe sin. Cúpla roc sa bhreis thart ar na súile. Súile oscailte, siosmaideacha. An gáire i gcónaí ag briseadh uirthi. Fáilte aici i dtólamh, ba chuma cé a bhí ann nó cén t-am den lá ar bhuail siad isteach. Fada ó shin. Sular fágadh Lára léi féin. Sula raibh Lára in ann an ceangal clainne a bhriseadh.

 ‘Chan insíonn tú d’éinne nuair atá tú ag teacht go Béal Feirste. Chan fheicimid thú riamh.’

Clic

Dílis

Dílis

Imní. Sin an focal cuí. Tá an clúdach deartha ag na foilsitheoirí. Tá cúpla dáta sa dialann...  nod.... má tá tú i mBaile Átha Cliath ar 17ú Deireadh Fómhair, beidh gloine fíona ag fanacht ort sa Chlub i Sráid Fhearchair ... Tá na profaí deireanacha réidh.

 Mo bhuíochas le Julianne Ní Chonchubhair, eagarthóir foighdeach, foighneach na bprofaí. Níl ann anois ach fanacht.