Bairín breac

D'athraigh na cloig aréir anseo. De réir na gclog, tá sé fiche i ndiaidh a hocht anois. De réir mo choirp is i ndiaidh a naoi atá sé, agus beidh, go cionn roinnt seachtainí.  Chuala mé mo chomharsa ag imeacht chuig an mharatón uair a' chloig ó shin. Ar a rothar. Déanfaidh sé an cúig chiliméadar déag isteach go lár na cathrach ar a rothar, ansin rithfidh sé an maratón, agus ansin tiocfaidh sé amach arís ar a rothar.

Níl neart air. Caithfidh mé suí agus cupán tae bheith agam. Agus slisín den bhairín breac a rinne mé inné. Tá mé lag just ag smaoineamh ar an aclaíocht sin ar fad.

Seo na comhábhair a chruinníonn tú don bhairín breac an tráthnóna roimh ré:
2 phunt torthaí tirime (900 g)
1 phunt siúcra donn (454 g)
3 chupán tae/ meascán den tae agus uisce beatha

Is féidir leat do rogha torthaí a úsáid - iad bheith 'measctha', ó na siopaí, nó sultanaí agus rísíní, nó roinnt sílíní bheith caite isteach. De réir mar atá agat sa chófra. Bhí roinnt pín-úll tirim agam i mbliana agus tá siad thar a bheith blasta sa cháca.

Muna bhfuil siúcra donn agat, siúcra bán.

Cupáin - muna bhfuil agat ach mugaí, muga go leith nó mar sin. Tae gan bainne, ar ndóigh.

Cuir na comhábhair luaite thuas isteach i mbabhla mór. Caith isteach cúpla deor uisce beatha má tá a leithéid sa teach agat. Measc iad, clúdaigh an babhla agus fág an meascán thar oíche.

An lá dar gcionn - nó an lá ina dhiaidh sin arís, muna bhfuil an t-am agat - ní thógánn sé ach cúpla bomaite an bairín brac a ullmhú le caitheamh isteach san oigheann. Bíodh trí stáin bhácála 6" nó dhá cheann 8" smeartha agus réidh. Úsáid páipéar ime leis na stánacha a smearadh, nó sprae ola. Cuir páipéar gréiscthe - gearrtha agus in oiriúint don mhias bácála - isteach iontu fosta.

Sa mhullach ar an mheascán fliuch, caith:

aon phunt plúir (454 g)
3 x spúnóg bheaga púdar bacála muna bhfuil sé istigh leis an phlúr (muna bhfuil sé 'féin-éiritheach')
3 x ubh bhuailte
spíosraí de réir mar is mian leat iad (caineál, sinséar, noitmig)

Measc iad.

Doirt isteach sna miasanna bácála iad.
Déan an rud a ndearna mé dearmad air i mbliana. Caith bonn airgid agus fainne isteach i ngach mias - páipéar gréiscthe craptha thart orthu.

Uair go leith in oigheann 'measartha' - 160 C, gas 3, 300 F
Ba cheart go dtiocfadh scian amach tirim má sháitear isteach sa cháca é.

Coinnigh na cácaí sna miasanna nuair a bhaintear amach as an oigheann iad, go dtí go bhfuaraíonn siad.

Tae. Im.

Agus... yeah. Tá an ceann sin cearnógach. Níl ach dhá mhias ciorclach agam! 'Nois, cupán eile tae agus slisín eile den bhairín breac ...

An tSamhain is an t-Úll

Bhí mé amuigh leis an chiorcal scríbhneoireachta aréir le haghaidh deochanna na Samhna. Drochsmaoineamh inniu. Nuair ba cheart dom bheith ag tabhairt faoi scríobh inniu ní raibh mé in ann...

Mar sin de, thug mé faoi chúrsaí Samhna. Toirtíní úll. Ach tá beirt sa teach nach dtógann aon rud a bhfuil táirgí bainne ann agus duine acu nach n-itheann cruithneacht.Mar sin de d'úsáid mé speilt agus ola.

D'ullmhaigh mé  na húlla ar dtús.

An taos ina dhiaidh sin. Níor úsáid mé speilt ariamh roimhe. Nóta don chéad uair eile: tuilleadh uisce agus ola ná mar a úsáidim le gnáthphlúr. fiú i ndiaidh leathuaire san fhuaradán bhí an taos sobhriste, briosc.

Chuir mé liomón agus cnónna mionaithe isteach i roinnt den taos. Rinne sé seo difir mór agus thug sé blas sa bhreis don taos. Nóta! Cuir breis siúcra agus slann i dtaos speilte thar mar a chuirfeá isteach i ngnáthphlúr.

Tá an dath níos dorcha ná gnáthphlúr bán, ar ndóigh, ach ní raibh caill ar an bhlas.

Agus os rud é go raibh úlla milse againn, rinne an mac jab leis na briogúin a bhí fágtha sa chófra ón bharbiciú sa samhradh. Mar ní raibh muid in ann teacht ar chipíní oiriúnacha in aon siopa. Múineann gá seift...

Agus mo bhuíochas don chara a thug cuairt inniu agus bronntanas léi. 

Oícheanta fada, laethe gearra

Is fuath liom an dorchadas an t-am seo bliana. Tuigim go rí-mhaith cad chuige an raibh oíche mhór siamsaíochta ag ár sinsir, gur las siad tinte leis na scáthanna a choinneáil amach uainn. Mothaím na vitimíní ag sileadh amach asam de réir mar a éagann an solas lae, beagán ar bheagán.

Ach is breá liom Oíche Shamhna in eastát cathrach - tagann na céadta páistí óga thart ar na doirse, gléasta chun iad féin a choinneáil sábháilte ina mbréagriocht ó na neacha osnádúrtha a thaithíonn an domhan an t-am seo bliana. An domhan s'againne insroichte, so-ionsaithe.

Cuirim coinnle amach chun fáilte a chur roimh na páistí seo, sula mbuaileann siad cnag ar mo dhoras, comhartha siombólach ar an bhearna idir an domhan nádúrtha agus an domhan osnádúrtha. Bíonn an bhearna seo tanaí, cúng agus caol an oíche seo.  Tagann na páistí thart ag iarraidh féiríní milise, iad go gleoite is tógtha, gach gáir astu.

Ní hionann an chathair agus an tuath, ar ndóigh.  Ní fheadar an bhfuil éinne thart fá Bhun Cranncha i nDún na nGall? Bhí mé ar cuairt ansin i rith an tsamhraidh agus bhí mé an-tógtha le Swan Park.

Tá doirse beaga curtha ar roinnt de na crainn chun 'bealach na síógaí' a chruthú.

Beagán costais, mórán éifeachta.

Páistí ar cipíní le geidín is giodal. Maith iad. Beidh an siúcra ag fanacht libh ag mo theachsa.

Lá na Samhna, Guatemala

Agus ní hionann an fhéile i dtír amháin agus i dtír eile, ar ndóigh. Tá bealach ar leith ag gach cultúr dul i dteagmháil leis na mairbh. Thuas thuas thuas in airde sa spéir in Guatemala, nó istigh go domhain sa tsiúcra agus sa bhia i Méjico.

An tSamhain, Méjico