Tá daoine ag caint ar 'Dílis', a bhuí mhór le Mor. Tá mé díreach ar ais ó Bhéal Feirste, áit a raibh léamh eile de chuid 'Sliocht' ar siúl le
Cló Iar-Chonnacht. Bhí muid
sa Chultúrlann, i nDánlann Gerard Dillon. (Dála an scéil, tá na leabhair thíosluaite uilig ar fáil uathu sa siopa ansin,
An Ceathrú Póilí)
Bhí ceathrar againn ag léamh, mé féin (
Dílis), Deirdre Ní Ghrianna (
An Gnáthrúd), Fionntán de Brún (
Litir Ó Mo Mháthair Altrama) agus Micheál Ó Conghaile (
Diabhlaíocht Dé). Bhí fíon agus solaistí ar fáil roimh an léamh, le linn sosa agus is beag a bhí fágtha ina dhiaidh. rud a chuir díomá orm, nó bhí mé ag fanacht go deireadh na hoíche sula mblaisfinn den stuif bán ... nó dearg. Agus faraor nach raibh Micheál Ó Conghaile in ann fíon a dhéanamh de mo ghloine uisce, chan ionann agus na carachtair ina scéalta.
Bhí lúcháir orm go raibh Deirdre Ní Ghrianna in ann teacht ar an oíche, mar is cnuasach an-láidir atá aici nach bhfuil mórán eolais ag go leor daoine air, seachas scéal féin na hArdteiste, 'An Gnáthrud'. Ach tá seoda eile istigh sa chnuasach seo nach é.
Chuir sé lúcháir orm chomh maith sean-
'bhoss' de mo chuid a fheiceáil ansin ar an oíche, John Salters, agus a bhean, Máirín. Ní minic a théann siad amach
ar an tear ar an aimsir seo, agus ba mhór liom gur tháinig siad agus gur ól siad roinnt den fhíon linn an oíche chéanna.
Agus focail scoir le buíochas mór a ghabháil le foireann An Ceathrú Póilí an oíche sin - Áine Nic Gearailt - úinéir an tsiopa - a d'eagraigh an oíche, agus
Dónall Mac Giolla Chóill, an
t-aisteoir agus an
t-iriseoir, a chuir na scríbhneoirí i láthair.
 |
| Róisín Adams ó Raidió na Life, Laithreoir 'Aon Scéal?' |
Is iomaí leabhar i gcló nach ndearnadh á bhrú os comhair an phobail agus a ligeadh dó titim i léig, ceal ama agus gairiúlachta ó thaobh a lucht margaíochta de. Cuimhním anseo ar 'Táinrith', le Biddy Jenkinson. Chonaic mé an leabhar sa Cheathrú Póilí i mBéal Feirste agus cheannaigh mé cóip. Leigh mé é, bhain mé sult as, chuir mé suntas ina fheabhas agus ina ghlice.
Cúpla mí ina dhiaidh sin bhuail mé le cairde fá choinne cupán caife sa Bhutrach i gColáiste na Trionóide i mBaile Átha Cliath. Táblaí mór fada agus binsí ann. Tháinig dornán mac léinn chuig an tábla agus mar go raibh muid ag comhrá i nGaeilge d'iarr siad cead suí sa chomhluadar. Mic léinn iarchéime. Duine acu ag dul do thaighde ar shaothar Biddy. D'fhiafraigh mé dó an raibh an leabhar léite aici. Ní raibh a fhios aige leabhar nua bheith amuigh ... Mar a deir siad sa bhaile,
ffs!
Tá sé thar a bheith tábhachtach an leabhar a chur
i mbéal an phobail, mar sin. Agus ansin is féidir leo a mbarúil a thabhairt nuair atá na leabhair léite. Chuir mé suntas sa mhéid a dúirt
Niamh Ní Chadhla sna scéalta a scríobh mé, ar an chlár 'Aon Scéal' ar Raidió na Life. Luaigh sí nár léigh sí aon ghearrscéal ó rinne sí an Ardteist - ar nós go leor daoine - agus is breá liom gur bhain sí sult astu. Ach mar bhean gan aon chur amach aici ar an Tuaisceart agus mar bhean óg ó ghlún 'eile' chuir me suim sa mheid a bhí le rá aici.
